1 Corinthians 14

Izipho Zokuphrofitha Lezezindimi

1Landelani indlela yothando lizifune ngokutshiseka izipho zakomoya ikakhulu isipho sokuphrofitha. 2Ngoba okhuluma ngezindimi kakhulumi ebantwini kodwa kuNkulunkulu. Impela kakho omzwayo; ukhuluma izimfihlakalo ngomoya wakhe.

3Kodwa umuntu wonke ophrofithayo ukhuluma ebantwini ukuba abaqinise, abakhuthaze njalo abaduduze. 4Lowo okhuluma ngolimi oluthile uyazakha, kodwa lowo ophrofithayo wakha ibandla. 5Ngifisa ukuba lonke likhulume ngezindimi, kodwa ikakhulu ukuba liphrofithe. Ophrofithayo mkhulu kulalowo okhuluma ngezindimi, ngaphandle kokuba echasisa, ukuze ibandla lakheke.

6Ngakho-ke, bazalwane, uma ngifika kini ngikhulume ngezindimi, ngilosizo bani kini, ngaphandle kokuba ngililethele ukwambulwa okuthile loba ukwazi loba isiphrofitho kumbe imfundiso, na? 7Lezizinto ezingaphiliyo ezenza umsindo njengomhlanga loba ichacho, umuntu angalazi njani iculo elikhaliswayo ngaphandle kokuba kulomahluko kuzimpawu zomculo?

8Njalo uma icilongo litshaya umbiko ongacacanga, ngubani ozalungela impi na?

9Kunjalo-ke lakini. Uma lingakhulumi amazwi azwakalayo ngolimi lwenu, umuntu uzakwazi njani elikutshoyo? Lizakuba likhuluma lomoya nje. 10Akuthandabuzwa ukuthi kule nhlobonhlobo zezindimi emhlabeni, kodwa kalukho olungatsho lutho. 11Uma ngingakuzwa okutshiwo ngomunye, ngingowezizweni kulowo okhulumayo, laye ngowezizweni kimi.

12Kunjalo-ke lakini. Njengoba litshisekela izipho zokomoya, zamani ukwenza kuhle kakhulu ngezipho ezakha ibandla.

13Ngakho-ke umuntu okhuluma ngezindimi kumele akhulekele ukuba achasise lokho akutshoyo. 14Ngoba uma ngikhuleka ngezindimi, umoya wami uyakhuleka, kodwa ingqondo yami kayilazithelo. 15Pho ngenzeni na? Ngizakhuleka ngomoya wami, kodwa ngizakhuleka langengqondo yami; ngizahlabela ngomoya wami, kodwa ngizahlabela langengqondo yami. 16Uma libonga uNkulunkulu ngomoya wenu, angatsho kanjani ozithola esephakathi kwalabo abangazwisisiyo ukuthi, “Ameni” ekubongeni kwenu, yena engakwazi elikutshoyo na? 17Lingabe libonga kuhle sibili, kodwa omunye umuntu kabusisekanga.

18Ngiyambonga uNkulunkulu ngoba mina ngikhuluma ngezindimi ukudlula lina lonke.

19Kodwa ebandleni ngithanda ukukhuluma amazwi amahlanu azwakalayo ngifundisa abanye kulamazwi ayizinkulungwane ezilitshumi ngezindimi. 20Bazalwane, yekelani ukucabanga njengabantwana. Mayelana lobubi wobani zingane, kodwa ekucabangeni kwenu wobani ngabadala. 21EMthethweni kulotshiwe ukuthi: “Ngabantu bezindimi ezingaziwayo langezindebe zabezizweni ngizakhuluma lalababantu, kodwa loba kunjalo kabayikungilalela,” kutsho iNkosi.

22Ngakho-ke izindimi ziyisibonakaliso, hatshi kwabakholwayo kodwa kwabangakholwayo; kodwa ukuphrofitha ngokwabakholwayo hatshi abangakholwayo.

23Ngakho uma ibandla lonke libuthene umuntu wonke akhulume ngezindimi, kuthi abanye abangezwayo loba abangakholwayo bangene, kambe kabazukuthi izingqondo zenu ziphambene na? 24Kodwa uma ongakholwayo loba omunye ongaqedisisiyo engena lapho abantu bonke bephrofitha, uzavunyiswa yibo bonke ukuthi uyisoni njalo ahlulelwe yibo bonke, 25lezimfihlo zenhliziyo yakhe zizavezwa obala. Ngakho uzakhothamela phansi akhonze uNkulunkulu esithi, “UNkulunkulu impela uphakathi kwenu!”

Ukukhonza Okuhlelwe Kuhle

26Pho sizakuthini, bazalwane? Lapho libuthana ndawonye, umuntu wonke ulehubo loba ilizwi lokufundisa, lokwambula, lezindimi, loba isichasiso. Konke lokhu kumele kwenzelwe ukuqinisa ibandla. 27Uma omunye ekhuluma ngezindimi, ababili – loba kungabangadluli abathathu – kumele kukhulume oyedwa ngesikhathi, njalo omunye kumele achasise.

28Nxa kungelamchasisi, okhulumayo kumele athule ebandleni, azikhulumele yedwa njalo loNkulunkulu.

29Kumele kukhulume abaphrofethi ababili loba abathathu, kuthi labanye bakuhlolisise ngokunanzelela okutshiwoyo. 30Njalo uma ukwambulelwa kufika komunye ohlezi phansi, okhulume kuqala kumele athule. 31Ngoba lonke lingaphrofitha lintshintshana ukuze umuntu wonke afundiswe njalo akhuthazwe. 32Imimoya yabaphrofethi iphathwa ngabaphrofethi.

33Ngoba uNkulunkulu kasuye Nkulunkulu wengxabangxoza kodwa owokuthula. Njengasemabandleni wonke abangcwele,

34abesifazana kumele bathule emabandleni. Kabavunyelwa ukukhuluma, kodwa kumele bazithobe, njengokutsho koMthetho. 35Nxa befuna ukubuza ngolutho oluthile, kumele babuze omkabo emakhaya; ngoba kulihlazo ukuthi owesifazana akhulume ebandleni.

36Konje ilizwi likaNkulunkulu lavela kini na? Loba lina yini kuphela abantu elafika kubo na?

37Uma umuntu ecabanga ukuthi ungumphrofethi loba ukuthi ulesipho sokomoya, kavume ukuthi lokhu engililobela ngakho kungumlayo weNkosi. 38Uma lokhu engakunaki, laye akayikunakwa.

39Ngakho-ke, bazalwane bami, tshisekelani ukuphrofitha, njalo lingenqabeli ukukhuluma ngezindimi.

40Kodwa izinto zonke kumele zenziwe ngendlela efaneleyo lehlelwe kuhle.